Szpacyrkiem po Cieszynie: Chybi im piniyndzy

Jak my uż wlyźli na tego Szersznika i cosi my ło nim napisali, to teraz zaś muszymy poglóndać na ty nasze kszefty. Piyrszy nazywo sie "Cotto", a ze zadku na wyrchu mo eszcze małe "n". Jak by kiery nie wiedzioł, to je to bawełna, jyno zaś napisano jakosi po zagranicznymu. Każdy teraz sie roztopiyrzo, że wszecko wiy, ale isto tyn szyld je dobry dlo młodzioków, bo moja starka miała by uż s tym doś starości. Kapke dalij na ausladze uż sóm polski wyrazy, ale tak sóm do kupy poskłodane, że mi sie zrobiło do śmiychu. Bo jak to poczytocie, to wyndzie na to, że skupujóm łod ludzi ślubne pierściónki. Jo bych im doradzoł, coby se taki drugi kszeft łodewrzili w sóndzie przi rozwodach, a ruch w interesie bydzie taki, że chybi im piniyndzy. Co je dalij, to isto zgodniecie aji z zawrzitymi łoczami, bo je to zaś babsko łobłyczka. Ku tej oblyczce za auslagóm majóm też wystyrczóne do kupiyno rozmajte taszki, bez kierych żodno paniczka ni może się obynś. Zaś dalij we dwiyrzach je maluśki kantor w kierym nasze złocioki możecie zmiynić na $ i Ä, ale też na czeski korónki.

Dzisio wica nie bydzie bo chciołbych zamias tego moc podziynkować wszeckim ludzim za to, że co tydziyń czytajóm tyn mój "szpacyrek" i sóm fest radzi s tego, że po naszymu mogóm se eszcze cosi pospóminać. Dziynkujym też za moc miłych gestów, kiere coroz czynścij mie spotykajóm. Zaś tych, kierzi lepszyj znajóm sie na naszej rzeczy, a to co piszym, nazywajóm bełkotym namówióm, coby cosi piekniej-szego napisali po naszymu i tu nóm do DZ posłali.

Tóż mjyjcie sie wszedcy dobrze i wiesiołego popióntku.