Szpacyrkiem po Cieszynie, czyli kącik gwarowy

"Gdo sie za swój jynzyk wstydzi, takim niech sie każdy brzidzi"

Za tym kszeftym z tymi modernymi cygaretlami mómy zieliniorza. Dzisio jak ty nasze szpitole ledwo dyszóm, to isto lepszyj tam do niego wlyź i jakisi kamelki se kupić. Możne, że mo też tam insze zieliny, kiere sóm dobre na rozmajte boleści i jak tam wleziecie, to wóm to isto zachwoli. Bo wiycie jako to je, jak człowiek je nimocny, to czasym starczy wierzić, że sie wyzdrowi i uż to nas postawi na klepeta. Nejlepszyj jednakowóż za moc nie chlastać i nie kurzić, a bydymy zdrowsi i nie dopadnie nas kuckani ani żodno żyrka.
Dalij kole klasztoru tych Mjynszych Franciszkanów je kościół, do kierego mogymy se wlyź i porzykać, coby nóm ty zieliny cosi pumógły. Kansi ci zakónnicy naszli, abo kogosi popytali o pinióndze, bo chycili sie pucowanio swojigo kościółka. Szkoda jyno, że zaś na tej płachcie co zakrywo tyn rusztónek wisi papyndekiel, na kierym pisze, że na chwile mogymy se u kogosi pojczać piniyndzy.
S tym pojczowanim na tóm chwile to bych wóm odradzoł i lepszyj przed tym se jedakowóż porzykać i popytać Pón Bóczka o rozum.
Jak uż spadki wyndymy s tego kościółka, a w kapsie bydymy mieć pore groszy, to zaroz wedla je masorz, kiery razym z miynsym i wórsztym przedo nóm żymły, chlyb abo kołocze. Je to łokropnie srandowne, ale isto ludzie to majóm radzi, jak kołocz wónio wórsztym, a chlyb szpyrkóm. Ani nie wjycie ludzie wiela skyrs tego możecie prziszporować.

A teraz zać fajny wic:
"- Posłóchej Kareł. Chcym moji babie dać wiyncyj swobody.
- Ja? A jako to chcesz zrobić?
- Na ganc ańfachowo. Poszyrzym ji kuchyń".